Хитой компаниялари Камбожа пойтахти Пномпенда дунёдаги энг баланд – 560 метрлик эгизак миноралар қуради, деб хабар бермоқда РИА “Новости” ахборот агентлиги. 

Агентлик маълумотларига кўра, икки осмонўпар бинонинг қурилишига шартнома Ухань шаҳрида Хитой ва Камбожа ҳамда Макао компаниялари ўртасида имзоланган. Бу бинолар TBR Twin Tower World Trade Center деб номланади. Биноларнинг қурилишига умумий инвестициялар миқдори 2,7 млрд долларга баҳоланмоқда.

Минораларнинг баландлиги 560 метрни ташкил қилади, улар Куала-Лумпурдаги (Малайзия) 88 қаватли Петронас минораларидан 108 метрга баландроқ бўлади. Малайзиядаги миноралар 1998 йилда қурилиши якунлангандан бери дунёдаги энг баланд эгизак миноралар ҳисобланади.

Эслатиб ўтамиз, дунёдаги энг баланд бино Дубайдаги 828 метрлик Бурж-Халифа  ҳисобланади.