Болгарияда ёмон об-ҳаво шароити – қор ёғиши ва кучли шамол туфайли ҳалок бўлганлар сони икки кишини ташкил қилмоқда. Тоғ-қутқарув хизматининг маълум қилишича, пешинда қор кўчкиси остида қолган сайёҳ ҳалок бўлган.  

Аввалроқ Сандански туманидаги қишлоқда 66 ёшли эркак совқотишдан вафот этганди.

Электр узатиш линиясидаги кўплаб авариялар туфайли 400 дан кўпроқ аҳоли пункти электрсиз қолиб кетган. Мамлакатнинг шимоли-шарқий қисмида йўл ҳаракати тўсилган. Варна ва Бургас туманларидаги "Хемус" ва "Фракия" бош автомагистраллари қор уюмлари сабабли ёпилган.

Мамлакатнинг табиий офат исканжасида қолган ҳудудларида 20 соатдан бери тинмай қор ёғмоқда, ҳарорат пасайиб кетган, кучли шамол йўлларда уюмлар ҳосил қилмоқда, ён-атроф кўриниши нол даражада. 

Қора денгиздаги портлар ёпилган. Поездлар катта кечикиш билан ҳаракатланмоқда.

Мамлакатнинг 20 та вилоятида қор ёғиши ва кучли шамол туфайли хавфли об-ҳаво ҳодисаларининг зарғалдоқ коди эълон қилинган, ҳарорат пасаймоқда. Денгизда бўрон ҳукм сурмоқда. Об-ҳаво мутахассислари вазият фақат якшанбагагина келиб бироз яхшиланишини тахмин қилмоқдалар