Бразилия шимолидаги қамоқхонада камида 33 маҳбус жонсиз ҳолда топилди. Бу ҳақда ушбу ҳолат юз берган Рорайма штати ҳукумати хабар берди.

"Адлия ва фуқаролик масалалари бўйича вазирлик 6 январь куни эрталаб "Монте-Кристо аграр пенитенциар муассасаси"да 33 та ўлим ҳолати қайд этилганини хабар берди. Вазият назорат остида, махсус амалиётлар батальони жангчилари (Бразилия ҳарбий полициясининг нуфузли бўлинмаси – таҳ.) ушбу қамоқхонада ҳудудида", - дейилади баёнотда.

Ҳужжатда воқеа нима сабабдан рўй берган хабар қилинмаган. Шу билан бир қаторда, UOL интернет-портали маълумотларига кўра, барча ҳалок бўлганлар наркомафиянинг икки душман гуруҳи қарама-қаршилиги оқибатида қурбон бўлишган. Нашрнинг хабар беришича, айни дамда ушбу қамоқхонада 1475 жиноятчи сақланмоқда, у эса аслида 750 кишига мўлжалланган.

Маълумот учун, Бразилия тарихидаги энг йирик қамоқхона исёни 1 январь куни Манаус шаҳрида юз берди. Ўшанда икки гуруҳ ўртасида бошланган қарама-қаршилик сабаб юз берган тартибсизликлар оқибатида 56 киши ҳалок бўлган.