Braziliyadagi qamoqxonada 30 dan ortiq mahbus jonsiz holda topildi

Braziliya shimolidagi qamoqxonada kamida 33 mahbus jonsiz holda topildi. Bu haqda ushbu holat yuz bergan Rorayma shtati hukumati xabar berdi.

"Adliya va fuqarolik masalalari bo‘yicha vazirlik 6 yanvar kuni ertalab "Monte-Kristo agrar penitentsiar muassasasi"da 33 ta o‘lim holati qayd etilganini xabar berdi. Vaziyat nazorat ostida, maxsus amaliyotlar bataloni jangchilari (Braziliya harbiy politsiyasining nufuzli bo‘linmasi – tah.) ushbu qamoqxonada hududida", - deyiladi bayonotda.

Hujjatda voqea nima sababdan ro‘y bergan xabar qilinmagan. Shu bilan bir qatorda, UOL internet-portali ma'lumotlariga ko‘ra, barcha halok bo‘lganlar narkomafiyaning ikki dushman guruhi qarama-qarshiligi oqibatida qurbon bo‘lishgan. Nashrning xabar berishicha, ayni damda ushbu qamoqxonada 1475 jinoyatchi saqlanmoqda, u esa aslida 750 kishiga mo‘ljallangan.

Ma'lumot uchun, Braziliya tarixidagi eng yirik qamoqxona isyoni 1 yanvar kuni Manaus shahrida yuz berdi. O‘shanda ikki guruh o‘rtasida boshlangan qarama-qarshilik sabab yuz bergan tartibsizliklar oqibatida 56 kishi halok bo‘lgan.