Meksikada talon-tarojliklarda ishtirok etgan 430 kishi hibsga olindi

Meksikada benzin narxi oshirilishiga qarshi norozilik namoyishlari davomida boshlangan do‘konlarga hujumlar va o‘g‘riliklarda ishtirok etgan 430 kishi hibsga olindi. Bu haqda Mexiko shtati bosh prokuraturasi ma'lum qildi.

"5 yanvar holatiga ko‘ra 430 kishi jinoyat ustida qo‘lga olingan. Ular orasida 306 nafari balog‘atga yetganlar, jumladan 255 erkak va 51 ayol hamda 124 nafari balog‘atga yetmaganlarni tashkil qiladi", deb aytildi hukumat xabarida. Ma'lum qilinishicha, ushlanganlar orasida 4 politsiyachi ham bor.  

1 yanvardan meksikaliklar benzin va dizel yoqilg‘isi narxi ancha oshganiga (20 foiz) qarshi norozilik bildirmoqdalar. Bundan norozi meksikaliklar mamlakatning bir qator hududlarida yo‘llarni to‘smoqdalar. Oxirgi kunlarda noroziliklar o‘g‘irliklar va tartibsizliklarga aylanib ketgan.

Yonilg‘i narxi Meksika milliy valyutasining dollarga nisbatan sezilarli qadrsizlanishi sababli qimmatlashdi. 2016 yilda pesoning qadrsizlanishi 20 foizni tashkil qilgan.