Миср масжидларидаги тарихий ҳамда бадиий қийматга эга бўлган ноёб буюмлар мамлакат музейларига берилади. Бу ҳақда Мисрнинг қадимий ёдгорликлар бўйича вазири Ҳолид ал-Онаний маълум қилди.

Унинг сўзларига кўра, қадимий ёдгорликлар вазирлиги ва вақфлар иши бўйича вазирлик (диний мулк) “тарихий қийматга эга бўлган буюмларни масжидлардан мамлакат музейларига бериш бўйича келишув лойиҳасини тайёрлашмоқда”. Вазирнинг аниқлик киритишича, бу биринчи навбатда, Қоҳирадаги “Ал-Ҳуссайний”, “Ар-Рифаий” ва “Ал-Аҳмадий” каби машҳур масжидларга тегишли.

Ал-Онанининг таъкидлашича, бу борадаги барча қарорлар юқоридаги ҳар икки вазирлик томонидан ташкил этилган комиссия томонидан қабул қилинади. Бундан ташқари, у “музейлардан жой оладиган барча буюмларнинг ўрнини уларнинг аниқ нусхалари эгаллаши” борасида ҳам ваъда берди. Мисрлик вазирнинг қўшимча қилишича, бундай чоралар “ноёб буюмлар ўғирланишининг олдини олиш” мақсадида қабул қилинмоқда.

Маълумот учун, ўтган ҳафта “Ар-Рифаий” масжидидаги миср қироллик оиласига тегишли сағанадан олтита ноёб кўза ўғирланди. Улар XIV аср бошида тайёрланган бўлиб, катта бадиий қийматга эга бўлган.

Ислом санъати соҳасидаги мутахассисларга кўра, айни дамда Мисрнинг турли масжидларида тахминан 300 га яқин ўта ноёб буюмлар мавжуд.