Америкалик ҳарбийларнинг Туркияга тегишли бўлган Инжирлик базасидан фойдаланишларини чеклаб қўйиш Вашингтоннинг Анқарага ИШИД билан курашда кўрсатаётган кўмагига салбий таъсир кўрсатиши мумкин. Бу ҳақда Оқ уй расмий вакили Жон Эрнест маълум қилди.

"Ўйлашимча, Инжирлик базасидан фойдаланишни чеклаш билан таҳдид қилиш бизнинг беришимиз мумкин бўлган кўмагимизга салбий таъсир кўрсатади", - деди Оқ уй матбуот котиби. Унинг таъкидлашича, бундай ҳаракатлар “чиптачига зарда қилиб пиёда кетиш” билан бир хил экан. У бундай бўлмаслигига умид билдирган.

Эрнестнинг сўзларига кўра, "Туркия НАТОнинг жуда муҳим иттифоқдоши ҳисобланади" ва Вашингтон Анқарага ИШИД билан курашда қўшимча кўмак беришга тайёр.

Аввалроқ, Туркия бош вазири ўринбосари Вейси Қайноқ Анқара АҚШ бошчилигидаги коалиция кучларининг Инжирлик авиабазасида жойлашиши масаласи қайта кўриб чиқилиши мумкинлигини маълум қилганди. Унинг таъкидлашича, ҳарбий базанинг коалиция ва НАТО кучлари томонидан ишлатилиши борасидаги масала Туркия ҳукуматининг кун тартибида бўлган.

Маълумот учун, Инжирлик авиабазаси АҚШ ва Туркия ҳарбий ҳаво кучлари томонидан ишлатилади ҳамда унинг фаолияти икки мамлакат ўртасидаги ҳарбий ва иқтисодий ҳамкорлик тўғрисидаги битим билан тартибга солинади. Базада АҚШ бошчилигидаги халқаро коалицияга кирувчи ва ИШИД террорчилик гуруҳига қарши ҳаво орқали ҳарбий амалиётда иштирок этадиган мамлакатлар самолётлари жойлаштирилган.