Бир гуруҳ қозоғистонлик ўсмирлар Россия ҳудудида қуролланган жиҳод уюштиришга уриниш ҳамда террорни тарғиб қилганлик учун турли муддатдаги қамоқ жазоларига маҳкум қилиндилар. Бу ҳақда Оқтўбе вилояти суди матбуот хизмати маълум қилди.

Гуруҳнинг 7 нафар аъзоси бўйича суд иши вилоятнинг жиноий ишлар бўйича ихтисослашган туманлараро судида кўриб чиқилди. Судланувчилар Қозоғистон Жиноят кодексининг 3 та – террорчилик гуруҳи яратиш ва унда иштирок этиш, террорчиликни тарғиб қилиш ва диний адоватни қўзғатиш моддалари бўйича айбландилар.

Маълум қилинишича, гуруҳнинг етакчисига айланган Кудайбергенов "диний экстремизмни тарғиб қилувчи хорижий имомларнинг радикал қарашларини қўллаб-қувватлаб, Россия ҳудудида ҳуқуқ-тартибот муассасалари ходимлари ва фуқароларига қарши қуролланган жиҳод учун террорчилик гуруҳи ташкил қилишга қарор қилган".  

Гуруҳ ўз режаларини ижарага олинган яширин квартирада муҳокама қилган. Гуруҳ аъзолари ўзларининг қабиҳ ниятиларини амалга ошириш учун ов қуролларидан фойдаланишни режалаштиришган. Кейинроқ гуруҳни маҳаллий мактаб ўқувчилари ҳисобига кенгайтиришга уринишлар бўлган. Суд материалларига кўра, ўсмирлар Россияда тунги клублар ва йирик савдо марказларида терактлар уюштирмоқчи бўлишган.

Гуруҳ ўз қарашларини интернетда ҳам тарғиб қилган.

Маълум қилинишича, гуруҳ етакчиси 9 йил озодликдан маҳрум қилинган. Қолган судланувчилар 6 йилдан 9 йилгача қамоқ жазоси олишган.