АҚШнинг сайланган президенти Дональд Трамп 5 январда жаҳон автомобилсозлиги етакчиси бўлган Япониянинг Toyota компаниясига агар у АҚШ ҳудудида завод қурмаса, унинг маҳсулотига юқори солиқлар солиш билан таҳдид қилди.  

"Toyota Motor АҚШ учун Corolla автомобиллари ишлаб чиқариш мақсадида Мексиканинг Бахасида янги завод қуришини айтди. Ҳеч қачон! АҚШда завод қуринг ёки чегарада катта солиқлар тўланг", деб ёзди Трамп твиттерда.

20 январда лавозимини бажаришга киришадиган Трамп ўз сайлов кампаниясининг муҳим бандларидан бири сифатида АҚШда янги иш ўринларини, жумладан хорижда ишловчи АҚШ компанияларини ортга чақириш билан яратишни айтганди. Трамп бу дастурни амалга ошириш учун мамлакат ичидаги корхоналар учун солиқларни камайтириб, импорт маҳсулотлар учун бож тўловларини оширмоқчи.

Трампнинг бу гапларидан кейин бир қатор компаниялар ишлаб чиқаришини АҚШга кўчириб ўтказишини ёки янги корхоналар яратишини маълум қилган.