Mirziyoyev: Xotin-qizlar uchun alohida poliklinikalar zarur

O‘zbekiston Respublikasi Prezidenti Shavkat Mirziyoyev 2017 yil 5 yanvar kuni sog‘liqni saqlash sohasining bir guruh yetakchi mutaxassislari bilan uchrashgani xususida avval xabar berilgan edi.

“Ammo bugun zamon o‘zgarmoqda, odamlarning talabi oshib bormoqda. Xalqimizning tibbiy madaniyati yuksalib, eng so‘nggi usul va rusumlarda tibbiy xizmat ko‘rsatilishini istaydi. Bizga shu ham bo‘laveradi, degan tushuncha endi o‘z umrini o‘tab bo‘ldi. Bu barcha sohalar qatori tibbiyot sohasiga ham bevosita daxldor”, – degan  davlat rahbari. – Shu bois, soha xodimlari tibbiyotning eng ilg‘or, zamonaviy yutuqlarini, davolash usullarini o‘zlashtirmog‘i zarur. Erishilgan yutuqlarga mahliyo bo‘lib o‘tirish taraqqiyot yo‘lidagi eng katta g‘ovdir”. 

Bundan tashqari, Shavkat Mirziyoyev o‘zbek ayollarining o‘ziga xos iboli, hayoli ekanliklarini ta'kidlab, ba'zi masalalarda shifokorga borib dardini bemalol ayta olmasligini qayd etgan. “Shunga ko‘ra, xotin-qizlar uchun alohida poliklinika tashkil qilishimiz kerak”, – degan Prezident. – Toki ular borib o‘zini qiynayotgan masalada bemalol fikrlashsin. Chunki ertangi kunimizning davomchilarini sog‘lom dunyoga keltirish ko‘p jihatdan ayollarimizning salomatligiga bog‘liq”. 

“Sog‘liqni saqlash sohasi haqida gapirganda bir haqiqatni esimizdan chiqarmasligimiz lozim: tibbiyot xodimlari bizning salomatligimiz posbonlaridir. Ularga xalq ishonishi, ular esa xalqni ishontira olishi kerak”, – deya ta'kidlagan Shavkat Mirziyoyev.