АҚШнинг янги сайланган президенти Дональд Трамп Индиана штатининг собиқ сенатори Дэниел (Дэн) Коутсни Америка миллий разведкаси раҳбари лавозимига расман тайинлади. Бу ҳақида республикачи жамоасининг сайтида хабар берилди

"Ишончим комилки, сенатор Дэн Коутс - миллий разведка раҳбарлигига тўғри танлов", - дея таъкидлади Трамп. 

У Коутснинг профессионал соҳада чуқур билимларини аниқ намоён эта олгани ҳамда соғлом фикрлаш қобилиятига урғу берди.  Трампнинг сўзларига кўра, разведка идорасини бошқариш учун айнан шу хусусиятлар зарур. 

Коутс бундай қарор учун Трампга миннатдорчилик билдирди. Сенатор у учун "Америка хавфсизлигини қўллаб-қувватлашдан муҳимроқ нарса йўқ"лиги ва бунинг учун қўлидан келганча ҳаракат қилишини қўшимча қилди. 

73 ёшли Коутс 10 йилдан ортиқ вақт давомида Индиана штати сенатори лавозимини эгаллаб келган ва сенатнинг разведка қўмитаси аъзоси бўлган. У кенжа Жорж Буш президентлиги даврида АҚШнинг Германиядаги элчиси лавозимида фаолият юритган.