Францияда президент лавозимига яна бир номзод пайдо бўлди. Бу лавозимга ўз номзодини "Францияни севиш" ҳаракати етакчиси ва собиқ банкир Оливье Режи қўйди, деб хабар бермоқда France Info радиостанцияси.

52 ёшли Режи 597 француз мэри ва бошқа амалдорларнинг имзосини тўплади, яна 150 нафар амалдор уни қўллаб-қувватлашга тайёрликларини билдирганлар. Ҳаммаси бўлиб камида 500 имзо керак. Режининг айтишича, унинг сайловолди кампанияси охиригача уни минг амалдор қўллаб-қувватлайди. 

2003 йилгача Режи банкда ишлаган, бироқ кейин бу фаолиятдан воз кечиб, Валь-д'Уаз департаментида маслаҳатчи бўлган. У "Францияни севиш" ҳаракати асосчиси ҳисобланади. Бу ҳаракатга 300 киши аъзо.

Франция президенти сайловлари икки босқичда 23 апрель ва 7 майда бўлиб ўтади. Мамлакат президенти лавозимига асосий номзодлар "Миллий фронт" партияси раҳбари Марин Ле Пен ва Франциянинг собиқ бош вазири Франсуа Фийон ҳисобланадилар.