Шимолий Корея раҳбарияти 2017 йил охири ёки 2018 йил бошигача АҚШ ҳудудига етиб борадиган, ядровий каллакли қитъалараро баллистик ракета яратишни ўз олдига мақсад қилиб қўйди. Бу ҳақда Лондонда ишлаган ва Жанубий Кореяга қочиб кетган собиқ Шимолий кореялик дипломат Тхэ Ён Хога иқтибос келтирган ҳолда "Рёнхап" ахборот агентлиги хабар бермоқда.  

"Шимолий Корея АҚШ ва Жанубий Кореяда сиёсий ўзгаришларни ҳисобга олиб, 2017 йил охири ёки 2018 йил бошигача АҚШгача етиб бора оладиган ракеталарга ўрнатиш мумкин бўлган, ўлчамлари кичик ядровий зарядларни яратишни ўз олдига мақсад қилиб қўйган", деб айтган собиқ дипломат.

5 январда Корея марказий телеграф агентлигининг маълум қилишича, Шимолий Кореяда қитъалараро баллистик ракетанинг синовдан ўтказилиши якуний босқичда турибди. Шимолий Корея етакчиси Ким Чен Ин халқига янги йил мурожаатида "агар АҚШ тажовузкор сиёсатини бас қилмаса, Шимолий Корея ўз ҳарбий салоҳиятини мустаҳкамлашини" айтган. Шимолий Корея етакчиси ўз давлатини "Шарқнинг ядровий давлати" деб атаган.

БМТ Хавфсизлик кенгаши резолюцияси Шимолий Кореяга баллистик ракета синовларини ўтказишни тақиқлайди. Пхеньянда бу ҳужжатлар тан олинмайди, чунки мамлакат Вашингтоннинг душманона сиёсати сабабли ўзининг мудофаа қобилиятини оширишга тўлиқ ҳуқуққа эгалиги айтилади.