КХДР етакчиси Ким Чен Ин кекса давлат амалдорлари устидан назоратни сусайтирмаслик учун ўзининг туғилган куни ва ёшини сир тутади. Бу ҳақда собиқ шимолий кореялик дипломат, Жанубий Кореяга қочиб ўтган Тхэ Ён Хо Ёнҳап агентлиги учун берган интервьюсида айтиб ўтган.

«Агар Кимнинг аниқ ёши очиқланса, у ўзидан 30-40 ёш улуғ амалдорлар билан қаттиққўл муносабат қилишда муаммога дуч келиши мумкин», — деган Тхэ Ён Хо.

Қайд этилишича, Ким Чен Ин ўз туғилган кунини 8 январь куни нишонлайди, аммо унинг туғилган йили ҳанузгача тасдиқланмаган. Турли манбаларга кўра шимолий кореяликлар етакчиси ёки 1982 йилда ёки 1984 йилда туғилган.

Бундан олдинроқ агентлик ҳарбий манбасига асосланган ҳолда АҚШ ва Жанубий Корея ҳамкорликда Ким Чен Инни ўлдириш учун махсус отряд тузиши ҳақида хабар берганди.