АҚШ президенти Барак Обама ABC телеканалига берган интервьюсида АҚШ разведкасининг президентлик сайловларига "Россия аралашуви" ҳақидаги ҳисоботига изоҳ берди.  

Обама ҳисоботни "жуда лўнда" деб таърифлади. "Руслар сайлов жараёнига аралашмоқчи бўлишган: бу кампания доирасида улар киберҳужумлар ўтказишган, шунингдек, уларда сайловлар натижалари нуқтаи назаридан яққол афзалликлар бўлган", деб айтди Обама.

Обама АҚШ разведкаси ҳам, унинг ўзи ҳам хулосаларнинг тўғрилигига ишончлари комиллигини айтди. "Мен бунинг асосида ётган манбалар ва ахборотни кўрдим ва бу ҳисоботни тўлиқ қўллаб-қувватлайман", деб таъкидлаб ўтди Обама. 

Обама журналистнинг у Владимир Путинни етарлича баҳоламагани ҳақидаги саволига рад жавобини берди.

"Етарлича баҳоламаганман, деб ўйламайман. Фикримча, мен етарлича баҳоламаган нарса шуки, янги ахборот асрида дезинформация ва киберҳужумлар бизнинг очиқ жамиятимизга, очиқ тизимимизга таъсир қилиши мумкин", деб айтди Обама.

Обама бундай аралашув НАТОга аъзо давлатлардаги сайловларда ҳам юз бериши мумкинлигини айтди.