Тадқиқот: "Россия 1" томошабинлари сони бўйича Биринчи канални ортда қолдирди

Жамият 09 Январь 2017 2744
фото: Fotolia

2016 йили "Россия 1" телеканали илк маротаба томошабинлари сони бўйича "Первый" канални ортда қолдирди. Бу ҳақда "Коммерсантъ" нашри Mediascope (собиқ TNS Россия) компаниясига асосланган ҳолда ёзмоқда.

""Россия 1" телеканалининг бир йиллик ўртача томошабинлари 13,4 фоиздан 13,6 гача кўтарилган, "Биринчи" каналнинг бу борадаги кўрсаткичи 14,3 фоиздан 13,3 фоизга пасайган. Тўрт ёшдан катта томошабинлар сони бўйича ҳам "Россия 1" 12,9 фоизлик натижа билан биринчи ўринга кўтарилиб олди. "Биринчи" йилни 12,7 фоизлик рақам билан якунлади", — дейилади нашр келтирган маълумотларда. 

Газетага кўра, бунгача Биринчи канал Россия телебозоридаги етакчилигини фақат бир марта бой берган. 2012 йилда унинг ўрнини НТВ эгаллаганди. 

Бироқ, алоҳида таъкидланишича, 2016 йилдаги 10 та энг машҳур теледастурнинг 9таси Биринчи канал томонидан намойиш этилган. 

Нашрнинг қайд этишича, сўнгги йилларда йирик федерал телеканаллар Россия телебозоридаги улушини йўқотмоқда. Агар беш йил муқаддам, Биринчи канал, НТВ ва "Россия 1" телетомошабинларнинг салкам ярмини жалб қилган бўлса, 2016 йил натижасига кўра — 36 фоизга яқинни ташкил этмоқда. 

Биринчи канал вакили, ўз навбатида, "Коммерсантъ"га билдиришича, телеканал раҳбарияти, аввалгидек, Mediascope тадқиқотларига ишонмайди.

2016 йил декабрь ойи ўрталарида Mediascope (TNS Россия) Россиядаги телеўлчовлар билан шуғулланувчи ягона ташкилот сифатида танланган эди. 

Кўпроқ янгиликлар