Жалақудуқда сув муаммоси Kun.uz’да эълон қилинган танқидий мақоладан сўнг бартараф этилди

Жамият 10 Январь 2017 21835

Хабарингиз бор 7 январь куни Kun.uz сайтида Андижон вилояти Жалақудуқ туманидан сув муаммоси бўйича мурожаат қилган фуқаро шикояти бўйича мақола берилган эди

Таҳририятимизга телефон орқали алоқага чиққан фуқаро тумандаги Ёрқишлоқ қишлоғи Марварид кўчасида аҳолини ичимлик суви билан таъминловчи қудуқ бир ойдан бери ишламаётганлиги оқибатида мазкур кўчада истиқомат қилувчи оилалар сувни 1 километр узоқликдан ташиб келиб ичаётганини билдирган.

Kun.uz мобил мухбири Жалақудуқ туманида бўлиб, Марварид кўчасида ичимлик суви муаммосини бартараф этиш борасида олиб борилаётган ишлар билан танишди. 

Мақола эълон қилинганидан сўнг Андижон вилояти ҳокими Шуҳратбек Абдураҳмонов вилоят “Сувоқава” ташкилоти ва туман ҳокимлиги мутасаддиларига мавжуд муаммони зудлик билан ҳал этиш бўйича тегишли топшириқларни берган бўлиб, айни пайт ҳудудда бир қатор ижобий ишлар амалга оширилган.

Марварид кўчасига борганимизда “Сувоқава” ташкилоти ишчилари ва маҳалла аҳлининг сув насосини созлаш ишлари билан шуғулланаётгани устидан чиқдик.

Вилоят “Сувоқава” ДУК бош муҳандиси Расулжон Тўланов ва туман ҳокимининг биринчи ўринбосари Муқимжон Ниязовлар шу ерда тўпланган Ёрқишлоқ фуқаролар йиғинида яшовчи аҳоли вакиллари билан суҳбатлашдилар. Марварид кўчасидаги 123 хонадонда 593 нафар киши истиқомат қилади. Маҳалла фаоллари 9 январь куни сув қудуғига вилоят ва туман “Сувоқава” ташкилотларининг саъй-ҳаракатлари билан сув тортиш насоси ўрнатилгани, натижада ичимлик суви билан боғлиқ камчиликлар тўла бартараф этилганини билдирдилар. Ҳозирда кўча бошидаги сув қувурига ичимлик суви тортилди. Энди аҳоли учун олисга бориб сув ташиб келиш муаммоси йўқ. 

Вилоят “Сувоқава” ДУК мутасаддиси Расулжон Тўланов фаоллар билан суҳбатда кўчадаги 1,2 км масофага ичимлик суви тармоғини тортиш лойиҳаси бўйича ишлар бошлангани ҳақида маълумот берди. Режага кўра келгуси икки ой давомида сув қудуғида лойиҳалаш ишлари олиб борилиб, кўчага сув тармоғи тортилади ва аҳолига қўшимча қулайликлар яратилади.

- Сув қудуғимизни ишга тушириб берганлиги учун вилоят ва туманимиз мутасаддиларига ўз миннатдорчилигимизни билдирамиз,- дейди маҳалла фаолларидан Раҳматжон ота Эргашев. Фуқаролардан Муқаддас Мирзаева, Абдуқаҳҳор Абдуғофуров, Фарҳод Қодиров ва Ҳусанбой Тўланбоевлар ҳам ўз ташаккурларини билдиришди.

Халқимизда: “Қарс икки қўлдан чиқади” деган ҳикмат бор. Шуни алоҳида таъкидлаб ўтиш жоизки, аҳоли ўртасида ичимлик сувидан фойдаланиш маданиятига алоҳида эътибор қаратиш лозим. 

Сайтимизда эълон қилинган таҳлилий мақолани самимий қабул қилиб, масалага ижобий ёндашган Андижон вилояти ҳокимлигига алоҳида ташаккур билдирамиз.

Элмурод Эрматов. Андижондан Kun.uz сайти учун махсус тайёрлади

Кун янгиликлари
Artel Technical School «Келажак мактаби» ўқув нархларини пасайтирмоқда!
20:02 / 21.08.2017 7727 Жамият
KUN.UZ хайрия акцияси: Жаҳонгирнинг бир оёғида операция ўтказилди, йигит барчадан миннатдор
19:03 / 21.08.2017 8569 Жамият
Ногиронлик ва мазлумлик исканжасида: бир аёл яхшилар саховатидан умидвор 
15:55 / 18.08.2017 51025 Жамият
Ёдгор Саъдиев мудраган ижод аҳли, тирикчиликка айланган ижод, ёш актрисалар ва тўйлар ҳақида 
Ўзбекистон Бош прокуратураси ходимлари Қозоғистонда бўлди
ФВВ тизими органларининг иш тартиби белгиланди
Ҳурматли абитуриентлар, сизнинг ҳали Олий ўқув юртига ўқишга кириш имкониятингиз бор!
09:55 2901 Lifestyle
КХДР АҚШ ва Жанубий Кореяга "шафқатсиз ўч олиш" билан таҳдид қилди
09:41 5173 Жаҳон
Чинозлик фуқаронинг уйидан 4 килограммга яқин марихуана моддаси топилди
09:38 892 Жамият
Ўзбекистон ТИВ раҳбари Ҳиндистоннинг таҳлилий марказлари вакиллари билан учрашди
Кўпроқ янгиликлар