Xabaringiz bor 7 yanvar kuni Kun.uz saytida Andijon viloyati Jalaquduq tumanidan suv muammosi bo‘yicha murojaat qilgan fuqaro shikoyati bo‘yicha maqola berilgan edi.
Tahririyatimizga telefon orqali aloqaga chiqqan fuqaro tumandagi Yorqishloq qishlog‘i Marvarid ko‘chasida aholini ichimlik suvi bilan ta'minlovchi quduq bir oydan beri ishlamayotganligi oqibatida mazkur ko‘chada istiqomat qiluvchi oilalar suvni 1 kilometr uzoqlikdan tashib kelib ichayotganini bildirgan.
Kun.uz mobil muxbiri Jalaquduq tumanida bo‘lib, Marvarid ko‘chasida ichimlik suvi muammosini bartaraf etish borasida olib borilayotgan ishlar bilan tanishdi.
Maqola e'lon qilinganidan so‘ng Andijon viloyati hokimi Shuhratbek Abdurahmonov viloyat “Suvoqava” tashkiloti va tuman hokimligi mutasaddilariga mavjud muammoni zudlik bilan hal etish bo‘yicha tegishli topshiriqlarni bergan bo‘lib, ayni payt hududda bir qator ijobiy ishlar amalga oshirilgan.
Marvarid ko‘chasiga borganimizda “Suvoqava” tashkiloti ishchilari va mahalla ahlining suv nasosini sozlash ishlari bilan shug‘ullanayotgani ustidan chiqdik.
Viloyat “Suvoqava” DUK bosh muhandisi Rasuljon To‘lanov va tuman hokimining birinchi o‘rinbosari Muqimjon Niyazovlar shu yerda to‘plangan Yorqishloq fuqarolar yig‘inida yashovchi aholi vakillari bilan suhbatlashdilar. Marvarid ko‘chasidagi 123 xonadonda 593 nafar kishi istiqomat qiladi. Mahalla faollari 9 yanvar kuni suv qudug‘iga viloyat va tuman “Suvoqava” tashkilotlarining sa'y-harakatlari bilan suv tortish nasosi o‘rnatilgani, natijada ichimlik suvi bilan bog‘liq kamchiliklar to‘la bartaraf etilganini bildirdilar. Hozirda ko‘cha boshidagi suv quvuriga ichimlik suvi tortildi. Endi aholi uchun olisga borib suv tashib kelish muammosi yo‘q.
Viloyat “Suvoqava” DUK mutasaddisi Rasuljon To‘lanov faollar bilan suhbatda ko‘chadagi 1,2 km masofaga ichimlik suvi tarmog‘ini tortish loyihasi bo‘yicha ishlar boshlangani haqida ma'lumot berdi. Rejaga ko‘ra kelgusi ikki oy davomida suv qudug‘ida loyihalash ishlari olib borilib, ko‘chaga suv tarmog‘i tortiladi va aholiga qo‘shimcha qulayliklar yaratiladi.
