WikiLeaks сайти “россиялик агентлар” АҚШнинг сайланган президенти Дональд Трампнинг обрўсини тушириши мумкин бўлган маълумотларга эга эканлиги ҳақидаги ОАВ хабарларини рад этди.

Аввалроқ, CNN номи ошкор этилмаган амалдорларга асосан, Америка махсус хизматлари Россияда Трампнинг обрўсини туширишга хизмат қилувчи маълумотлар борлигини гумон қилишаётгани ҳақида хабар берганди. Телеканаллар маълумотига кўра, разведкада буни тасдиқловчи далиллар йўқ.

BuzzFeed портали эса махсус хизматларнинг тахминига бағишланган ҳужжат матнини чоп этди. "BuzzFeed томонидан эълон қилинган ва Трампга тегишли бўлган 35 саҳифали файл разведка ҳисоботи эмас. Йўналиш, далиллар ва саналар ҳеч қандай ҳақиқатни ўзида акс эттирмайди", - дейилади WikiLeaks’нинг Twitter’даги саҳифасида эълон қилинган хабарда.

CNN’нинг таъкидлашича, президент обрўсини туширувчи маълумотлар икки бетдан иборат қисқа шарҳда келтирилган ва у махсус хизматлар ҳисоботига қўшимча тарзда бириктирилган. Телеканаллар манбаларининг сўзларига кўра, Россиялик “агентлар” Трамп ҳақида шахсий ва молиявий маълумотга эга.

Телеканалнинг тахминича, бундай хабарларнинг бир қисми Британия раздведкасининг собиқ ходими ёзувлари асосига қурилган. CNN ФҚБ бундай тахминларни текшираётганини таъкидлади.