Дональд Трамп оиласига тегишли бутун дунёдаги меҳмонхоналарда хорижий ҳукуматлар яшашидан тушадиган даромад АҚШ ғазнасига ўтказилади. Бу ҳақда Трампнинг ҳуқуқшуноси Шери Диллон маълум қилди. 

"Президент этиб сайланган Трамп унинг меҳмонхоналарида яшаш учун хорижий ҳукуматлар тўлайдиган ҳақдан олинадиган даромадни кўнгилли тарзда АҚШ ғазнасига хайр-эҳсон қилади. Шу тариқа, бундан америкаликлар фойда кўради", деб айтди Диллон. 

Диллоннинг айтишича, шу йўл билан "манфаатлар зиддияти"дан қочишга муваффақ бўлинади. "Биз аминмизки, бундай тузилма ва қадамлар сайланган президентнинг бизнес манфаатларидан узоқлашишга интилишини қондиришга имкон беради ва одамларнинг унинг ягона мақсади – Американи яна буюк қилиш эканлигига ишончини таъминлайди", деб қўшимча қилди ҳуқуқшунос.

Аввалроқ Диллон Трамп иштирокидаги матбуот анжуманда унинг барча активлари инаугурациясигача траст бошқарувга топширилишини айтганди. Диллоннинг айтишича, Трамп АҚШ президенти бўлган вақтда унинг компанияси хорижда ҳеч қандай шартномалар тузмайди, мамлакат ичидаги битимлар эса манфаатлар зиддияти ҳолатига қаттиқ назорат остида ўтади. Трамп ўз компанияси билан алоқа қилмайди, бироқ ўз активларидан воз кечмайди. Унинг бизнесини катта ўғиллари – Кичик Дональд ва Эрик бошқаради.