АҚШ президенти этиб сайланган Дональд Трамп Мексика билан девор қуришни чўзиб ўтириш ниятида эмаслигини айтди. Трамп бу ҳақда Нью-Йоркда ўзига тегишли Трамп-тауэр биносида ўтган матбуот анжуманида айтиб ўтди. Ушбу матбуот анжуман C-SPAN телеканали томонидан эфирга узатилган.

"Мен кутишни истамайман. Мен бир йил ёки 1,5 йил кутишни истамайман. Мен ҳозироқ қуришни бошламоқчиман. Шундай бўлади ҳам", деб айтган Трамп.

У Мексикани "ўз манфаатлари йўлида АҚШдан фойдалана бошлаганликда" айбламаслигини таъкидлаб ўтди.

"Мен Мексика халқини яхши кўраман, менинг қўлимда кўплаб мексикаликлар ишлайди ва улар ажойиб инсонлар", деб қўшимча қилди Трамп.

Шунингдек матбуот анжумани давомида журналистлар Мексика билан қурилажак "тўсиқ" ҳақида сўрашганда Трамп бу "тўсиқ" эмаслиги, балки "девор"лигини айтган. Трампнинг айтишича, девор албатта қурилади ва шу билан бирга бунинг учун Мексика ҳақ тўлайди.

Аввалроқ Мексиканинг янги ташқи ишлар вазири Луис Видегарай Мексика ҳеч қандай вариантда ҳам АҚШ чегарасида "Трамп девори" қурилиши учун ҳақ тўламаслигини айтганди.