Ту-154 авиаҳалокати қурбонларининг жасадлари қолдиқлари ДНК-экспертизадан ўтказилгач, «Адолатли ёрдам» фонди раҳбари бўлган Елизавета Глинка (доктор Лиза) жасади аниқланди. ТАСС нашри хабар беришича, унинг жасади 16 январь куни Новодевичье қабристонига дафн этилади.

25 декабрь тонгида Россия Мудофаа вазирлигининг Ту-154 самолёти Сурияга учиш вақтида Қора денгизга қулади. Бортдаги экипаж аъзолари, ҳарбийлар, журналистлар, Александрова оркестри мусиқачилари, доктор Лиза, жами 92 киши ҳалок бўлган.

Елизавета Глинка ўзининг хайрия ишлари, ёрдам ташаббуслари билан танилган эди (у Доктор Лиза тахаллуси остида блог юритган, 2010 йили Россияда йил блогери деб тан олинган). 2015 йилдан бошлаб гуманитар миссиялар сафида бир неча бор Сурияда бўлган ҳамда сурияликларга дори-дармон тарқатиш ва тиббий ёрдам кўрсатиш ишларида қатнашган.