АҚШ президенти этиб сайланган Дональд Трампнинг инаугурация қўмитаси Трампнинг янги лавозимга киришиши маросимини ўтказиш учун хусусий ҳомийлар томонидан рекорд даражадаги 90 млн доллар хайрия маблағлари йиға олди. Бу маросим 20 январда Вашингтонда бўлиб ўтади. Бу ҳақда AP ахборот агентлиги хабар бермоқда.    

Трамп томонидан йиғилган қиймат амалдаги президент Барак Обама 2009 ва 2013 йилларда йиға олган маблағлардан анча кўпроқни ташкил қилади. Бу қийматлар мос равишда 55 ва 43 млн долларни ташкил қилган.    

Аввалроқ The Washington Post нашри АҚШнинг 45-президенти ўз лавозимига киришиши муносабати билан байрам тадбирларининг ўтказилиши харажатлари 175-200 млн доллар ташкил қилишини ва бу қиймат аввалги бундай харажатлардан унча кўпмаслигини маълум қилганди. Нашрнинг таъкидлашича, бу харажатлар сувенирлар ҳамда бал ва тушликларга чипталар сотиш, корпорациялар ва сиёсий ташкилотлар, жисмоний шахслар хайр-эҳсонлари ҳисобига қопланади.