АҚШда юз йилдан зиёд вақт давомида фаолият юритиб келаётган энг қадимий The Ringling Bros. and Barnum & Bailey цирки 2017 йилнинг май ойида ўзининг сўнгги томошасини оммага ҳавола этадиган бўлди. Сабаб - чипталар сотувининг тушиб кетиши ва катта харажатлар. Бу ҳақида 14 январь, шанба куни цирк эгаси ҳисобланувчи Feld Entertainment компанияси раҳбари Кеннет Фелд берган хабарга асосланиб, ТАСС агентлиги маълум қилди. 

"Узоқ ўй-фикрлар ва ҳисоб-китоблардан сўнг мен ва менинг оилам шу йилнинг май ойида энг охирги томошани қўйишга қарор қилдик. The Ringling Bros. чипталари сотуви пасаймоқда, бироқ бу тенденция цирк филларининг қариши натижасида янада мураккаблашади. Катта харажатларни ҳам инобатга оладиган бўлсак, циркнинг бундан кейинги фаолияти ночор бизнесга айланади", - дея изоҳлади 1967 йилдан буён The Ringling Bros. and Barnum & Bailey'га эгалик қилувчи оила аъзоси Фелд.

Компания раҳбари циркнинг содиқ мухлисларига ўз миннатдорчилигини билдирди. Сўнгги шоу 7 ва 21 май кунлари Род-Айленд ва Нью-Йорк штатларида бўлиб ўтади. 

Жониворлар ҳуқуқ ҳимоячилари узоқ йиллар давомида The Ringling Bros. and Barnum & Bailey соҳиблари билан кураш олиб боришди. Цирк эгалари 2011 йилда тинчлик шартномаси асосида 270 минг доллар миқдорида жарима тўлашди. Feld Entertainment жониворлар билан шафқатсиз муносабатда бўлганини тан олмаган, лекин ҳайвон ўргатувчиларнинг профессионал тайёргарлигига керакли ўзгаришларни киритишга ваъда берган.

Цирк 1884 йилда Висконсин штатида очилган. Ўргатилган филлар шоуси труппанинг "ташриф қоғози"га айланган.