АҚШда дунёда биринчи марта 26 антибиотикка чидамли супербактериядан ўлиш ҳолати қайд этилди. Бу ҳақида BBC News хабар берди. 

2016 йилнинг августида Невада штатида яшовчи аёл Ҳиндистонда дам олиб келганидан кейин Қўшма Штатларга қайтди ва бехосдан ўнг оёғини синдириб олди. Сентябрь ойида 70 ёшли аёл септик шок натижасида ҳаётдан кўз юмди. 

Касалликларни назорат қилиш ва даволаш маркази мутахассислари тўқима намуналарида Klebsiella pneumoniae бактериясини аниқлашди. У одатда касалликларни чақирмай, ичак, тери ва оғиз бўшлиғининг нормал микрофлораси таркибига киради.

Бироқ бу сафар айнан унинг янги штамми америкалик аёл ўлимига сабаб бўлди. Тадқиқотларнинг кўрсатишича, у АҚШда мавжуд  26 антибиотикнинг барчасига чидамли бўлиб чиққан. 

Британиядаги Антибиотикларни тадқиқ қилиш марказининг бош илмий ходими доктор Дэвид Брауннинг сўзларига кўра, супербактериялар билан касалланиш ҳолатлари фавқулодда кам учрайди, бироқ келгусида бундай ҳолатлар кўпайиши мумкинлиги тахмин қилинмоқда. 

Антиботикларга чидамлилик табиий танлов натижасида ривожланиши мумкин, бу эса бактериялар орасидаги микроорганизмларни доривор препаратларга қаршилик қилиш хусусияти билан таъминловчи мутацияларнинг кенгайишига олиб келади. Тиббиёт ходимлари супербактериялар туфайли юзага келувчи касалликларни самарали даволаш имконини берувчи янги усулларни ишлаб чиқишмоқда. Масалан, ноназаррачаларни қўллаш 92 фоизгача патоген микроорганизмларни ўлдиришга имкон беради.