Россия ихтиёрига алоҳида давлатлар ва нуфузли хорижий компанияларнинг террорчилик ташкилотлари билан ҳамкорлигининг янги исботлари келиб тушмоқда, деб айтди Россия хавфсизлик кенгаши котиби Николай Патрушев.

Унинг айтишича, Россия БМТ Хавфсизлик кенгаши доирасида ишларни фаоллаштиришга муваффақ бўлди. Патрушевнинг таъкидлашича, Россия ИШИД ва бошқа террорчилик ташкилотлари ва террорчиликни молиялаштиришга қарши курашга қаратилган муҳим резолюцияларнинг қабул қилинишига туртки берган.

"Бугунги кунда бизнинг ихтиёримизга баъзи давлатлар ҳамда нуфузли хорижий, баъзи ҳолларда эса трансмиллий компанияларнинг террорчилар билан ҳамкорлик қилишининг янгидан-янги исботлари келиб тушмоқда. Гап террорчилардан нефть ва бошқа хом ашёларнинг сотиб олиниши ҳамда улар томонидан назорат қилинувчи ҳудудларда маҳсулотлар ишлаб чиқариш ва ташишга рухсат олиш учун уларга пул тўланаётгани ҳақида кетмоқда", деб айтган Патрушев.

Патрушевнинг айтишича, бундай амалиётга йўл қўймаслик террорчиликка қарши курашишини айтувчи барча давлатларнинг вазифасидир.