Суриядаги "Демократик Федерация" (курд мухтор ҳудудининг бошқарув органи) ижроий қўмитаси Сурия шимолидаги курдлар вакилларининг Остонадаги тинчлик конференциясида иштирок этмаслигини қоралади. Бу маълумот Фират ахборот агентлиги томонидан тарқатилди.

Қўмита баёнотида қайд этилишича, курдлар делегациясининг бу учрашувда бўлмаслиги "форум иши ижобий натижа" келтирмаслигига сабаб бўлади.

"Демократик федерация" ҳамраиси Фауза Юсуфнинг айтишича, "Сурия демократик кучлари" қуролли коалициясининг тинчлик музокараларидаги иштирокини Суриядаги вазиятдан ўз манфаатлари йўлида фойдаланишни мақсад қилган Туркия томонидан тўсиб қўйилган.

Унинг сўзларига кўра, Анқара Сурия Араб Республикаси шимолида ўз таъсирини кенгайтиришга интилмоқда ва бу ҳудудда курдларнинг кучайишига йўл қўймоқчи эмас.

"Туркия позицияси Шимолий Сурия федерациясини тузишдан қайтара олмайди. Бу лойиҳа 2 ҳафта аввал Румейлендаги форумда қатнашган 165 нафар депутат томонидан қўллаб-қувватланди", дея қайд этган Юсуф.

Унинг фикрича, бу лойиҳа ҳудудда истиқомат қилувчи араблар, курдлар, оссурлар, туркманлар ва арманларнинг манфаатларини ифодалайди.

"Сурия демократик кучлари" асоси курд отрядларидан иборат бўлиб, бу ҳарбий бўлинмалар Хасекени ИШИДдан озод қилди ҳамда Ҳалаб шимолидаги Кобани ва Манбижни жангарилар эгаллаб олишига йўл қўймади.

"Террорчилар билан жанглардаги муваффақиятларни ҳисобга олган ҳолда СДИ бошқа ҳар қандай фракциядан кўра Остонадаги йиғилишда иштирок этишга ҳақли эди", дея қайд этган федерация ҳамраиси.

У курдларнинг партияси 2016 йилда Женева музокараларига чақирилмагани ва оқибатда бу музокаралар муваффақиятсизликка учраганини эслатиб ўтган.

Россия ва Туркия ташаббуси билан Суриядаги низоли томонлар ўртасидаги музокаралар 23 январь куни Остонада бўлиб ўтиши режалаштирилган.

Сурия президенти Башар Асад ҳам Остонада мухолифат билан музокаралар ўтказишга тайёрлигини айтган.

"Агар ҳақиқий Сурия мухолифати бўлса, яъни Саудия Арабистони, Франция ва Буюк Британия одамлари эмас, оддий сурияликлар бўлса, унда биз асосий масалаларни муҳокама қила оламиз", — деган Сурия президенти.

Учта давлат дипломатлари Сурия бўйича Остонадаги учрашувга тайёргарликни муҳокама қилишди

Россия Трамп маъмуриятини Сурия бўйича Остона музокараларига таклиф қилган