Давлат йўл ҳаракати хавфсизлиги хизмати ходими қизил чироқ ёниб турганида ҳам ҳаракатланишда давом этиб, пиёдани уриб кетишига бир бахя қолган ҳайдовчининг ҳаракатига лоқайдлик билан қаради. Бу вазият видеоёзуви YouTube порталига жойлаштирилган.

Бу вазиятда ортда келаётган ҳайдовчилардан бири томонидан олинган видеода кўриш мумкинки, Тошкент шаҳридаги «Минор» метро бекати олдидаги чорраҳада Nexia автомобили йўл ҳаракати қоидасини қўпол равишда бузиб ўтиб, яшил чироқ ёнганида пиёдалар йўлагини кесиб ўтишга киришган ёш қизчанинг устига юриб борган. 

Бу вазиятда ҳеч ким жабрланмаган, лекин барчаси ўта ёмон тус олиши ҳам мумкин эди, қоидабузар қарама-қарши йўналишдан юриб, олдинга чиқиб борганди.

Видеода яна бир жиҳатга эътибор бериш керакки, бу ҳодиса рўй берган нуқтада Давлат йўл ҳаракати хавфсизлиги хизмати инспектори кийимидаги ходим ҳам бор эди, у ҳам йўлакдан ўтаётганди. Лекин у қоидабузарнинг ҳаракатига ҳеч қандай муносабат билдирмаган ва йўлида давом этган. Видео муаллифи бу жараёнда ўзини тутиб тура олмаган, сигнал чақириб, инспектордан қоидабузарни тўхтатишни сўраган, аммо бу бефойда бўлган.