Хитой 2020 йилга келиб, янги энергияда ҳаракатланувчи автомобиллар (new energy vehicles, NEV) деб номланувчи маҳсулотлар ишлаб чиқаришни 4 бараварга ошириб, йилига 2 млн донага етказишни режалаштирмоқда.

Синьхуа агентлигининг ёзишича, мазкур режалар хусусида ХХР саноат ва ахборот вазири Мяо Вэй маълум қилган. 2016 йилда Хитойда 517 минг дона NEV автомобиллари ишлаб чиқарилган. 

Мяо Вэйнинг қайд этишича, 2025 йилга бориб, Хитой автомобиль бозоридаги савдоларнинг 20 фоизи айнан шу каби транспорт воситалари ҳиссасига тўғри келади. 

Янги энергия манбаларида ҳаракатланувчи машиналарга асосан электромобиллар, гибрид машиналар ҳамда ёнилғи элементида (масалан, водород асосидаги электрокимёвий қурилма) юрадиган автомобиллар киради. 

Декабрь ойи ўрталарида хабар қилинганидек, Хитойнинг 5та компанияси мамлакат ҳудудида NEV автомобилларини ишлаб чиқаришга тахминан 432 миллион доллар сармоя киритишни режалаштирган. Хитой ҳукумати, шунингдек, 2020 йилга келиб, мамлакатда энг йирик тадқиқотлар ва ишлаб чиқариш марказини барпо этишни режалаштирган.