Wilton Classic & Supercar ташкилоти Bugatti Veyron ва Хорватиянинг Rimac компанияси томонидан ишлаб чиқилган — 1088 от кучига эга Concept One электрокари ўртасида пойга уюштирди. Куч синашиш Rimac бош синовчи-ҳайдовчиси иштирокида бўлиб ўтган.

Одатдаги 402 метрлик (чорак миль) масофада Хорватия суперкари, гарчи финиш чизиғига яқинлашганда Veyron рақиби билан деярли тенглашган бўлса-да, Bugatti моделини ортда қолдирди. 

Сoncept One 4 та электромотор билан жиҳозланган. У 1850 кглик вазнда жойидан соатига 100 километр тезликка 2,8 сонияда эришади. Концептнинг энг юқори тезлиги соатига 305 кмни ташкил этади. 

Қайд этиш жоизки, Сoncept One билан оддий модификациядаги, 1001 от кучига эга, 8 литр ҳажмли W16 мотори ўрнатилган Bugatti Veyron куч синашган. У илк юзликка 2,5 сонияда чиқади, энг юқори тезлиги соатига 407 кмни ташкил этади. 

Бундан аввал, Хорватия электр суперкари Tesla Model S P90D хэтчбеки ва LaFerrari супергибриди билан бўлган пойгаларда ҳам рақибларини ортда қолдирган эди. Rimac фирмаси Concept One лойиҳаси билан 2009 йилдан шуғулланиб келади. Унинг илк концепти 2011 йилда намойиш қилинган эди. 

Компания 2016 йилда ўтказган тақдимотида, ушбу суперкардан, ҳар бири 800 минг евродан бўлган атиги саккиз нусха ишлаб чиқарилишини маълум қилган эди.