Ўтган 2016 йил ҳар бир соҳада сарҳисобли йил бўлди. Бу йилда кимдир муваффақият сари одимлади, бошқа биров учун эса янги ғоялар имконияти туғилди, кимлар учундир эса ўз ғояларини амалга ошириш йили бўлди. Шуни айтиб ўтиш лозимки, сайтимиз фаолиятида ҳам кўзга кўринарли ишлар амалга оширилди. Ортга қараб, ўтган йил сарҳисобига назар ташлаганимзда, қилаётган меҳнатларимиз, амалга ошираётган ғояларимиз бежизга эмаслигини, ўзбек ўқувчисининг дунёқараши янада кенгайиб, Ўзбекистон ва жаҳонда рўй бераётган воқеа-ҳодисаларни кузатишда фаол бўлаётгани ва мана шу жараёнга озгина бўлсада ҳисса қўшаётганимиздан мамнун бўлдик.

Шу ўринда айтиб ўтишимиз лозимки, Кун.uz сайти ўз ишини 2012 йил 16 январидан бошлаган. Ўтган давр мобайнида жамият ҳаётида янгилик бўлган интернет журналистикаси соҳасида дадил қадам ташлаш дастлаб бизни бироз чўчитди, аммо одамларимизнинг талаб ва истаклари ва жамиятнинг тезкор,холис ахборотга бўлган эҳтиёжидан келиб чиқиб, ўз ғояларимизни амалда татбиқ этишга киришдек.

2012 йилдан 2013 йилга қадар бўлган вақт мобайнида сайтимизга ташрифлар сони 1 600 000 кишини ташкил этиб, унда кўрилган саҳифалар сони 5 200 000 тани ташкил этган эди.

Бу рақамлар 2015 дан 2016 йилгача бўлган давр оралиғида ижобий томонга ўзгарди: ташрифлар сони 32 000 000 кишини ташкил этди, 154 000 000 саҳифа кузатилди.

Бу ҳолат 2016 йилдан 2017 йилгача қуйидагича тус олди: Сайтга 66 345 000 киши ташриф буюрди ва унда 255 000 000 саҳифа ўқилди. Демак ўртача ҳисобда 2016 йил давомида сайтга бир кунлик ташрифлар сони 181 000 дан ортиқ киши бўлса, улар 698 000 дан ортиқ саҳифани кўришган.

Шу ўринда қўшимча қилишни лозим топдик: сайтга кирувчиларнинг 70 фоиздан ортиғи Ўзбекистон, 15 фоизи МДҲ давлатлари, 10 фоизи Осиёнинг бошқа давлатлари, қолган 5 фоизи дунёнинг бошқа давлатлари ҳиссасига тўғри келади.

Аудиториямизнинг аксарият қисми яъни 76 фоизи эркаклар булса, 24 фоизи аёлларни ташкил қилади!

Бу борада ёш жиҳатдан олиб қаралса:
25-34 ёшлилар 42 фоиз;
18 -24 ёшлилар 19 фоиз;
35-45 ёшлилар 17 фоиз;
45- 54 ёшгача булганлар 10 фоиз;
55-64 ёшгача булганлар 10 фоиз;
65+ 2 фоизни ташкил этади.

2016 йилда 60 мингдан ортиқ янгилик ва мақолалар сайтга жойлаштирилди.

Ижтимоий тармоқлардаги саҳифаларимиздаги обуначилар сони 16.01.2017 санасига кўра:
Instagram’да 291 минг;
“Одноклассники” 153 минг;
“Телеграм” каналимизда 110 минг; 
Facebook ижтимоий тармоғида 90 мингдан ортиқ;
Twitter’да деярли 17 минг обуначи бизни мунтазам ва фаол кузатиб боради.

Яна бир ажойиб янгилик! 2017 йилнинг илк кунларидан Youtube видеохостингида ҳам ўз каналимизни ишга туширдик. У ерда ҳозиргача 500 киши обуна бўлишга улгурди (сизга ҳам каналимизга қўшилишни тавсия этамиз, чунки қизиқари янгиликларни энди видео шаклда ҳам кузатиш имкониятига эга бўласиз.

Булардан ташқари, “Вконтакте” ижтимоий тармоғида ҳам ўз саҳифамизни юрита бошладик. Ҳозирга қадар у ерда 62 бахтли инсон обуна бўлишга муваффақ бўлди!

Сайт дизайни бир йил ичида уч маротаба ўзгарди. Мобил иловалар (Android ва IOS) қайта ишланди ва буларнинг бари ўқувчиларимизга янада қулайлик ва енгиллик яратиш мақсадида амалга оширилди.

2017 йилдаги режаларимиз ҳам бисёр. Мазкур йил юртимиздаги барча соҳаларда ривожланиш ва тараққий этиш йили бўлсин. Кун.uz ижодкорлари ҳам изланишдан асло тўхтамайди. Ўз муштарийларига янгидан янги ғоялар, ўзгаришларни тақдим этишда давом этади. Бизни кузатишдан чарчаманг, зеро Она сайёрамиз айлинишда давом этади ва ундаги ҳар бир сонияда бўлаётган янгиликлар талқинини фақат Кун.uz’да тилга олинади!

Эътибор учун ташаккур ҳурматли ўқувчи!