General Motors яқин вақт ичида АҚШ ҳудудида ишловчи корхоналарини кенгайтиришга 1 миллиард доллар инвестиция киритиб, қўшимча мингта янги иш ўрни яратиши ҳақида маълум қилади. Бу ҳақда Bloomberg ўз номини ошкор этишни истамаган манбага асосан хабар берди. Унинг сўзларига кўра, корпорация томонидан бундай қарор Дональд Трамп томонидан босим ўтказилгач, қабул қилинган.

Инвестициялар ишлаб чиқаришни янада кенгайтиришга тегишли бўлиб, улар янги автомобиллар ишлаб чиқариш учун қайта жиҳозлаш бўйича режанинг бир қисмига айланади.

Аввалроқ GM Трампнинг Chevrolet Cruze ишлаб чиқаришни Мексикадан АҚШга кўчириш ҳақидаги буйруғини бажаришдан бош тортганди.

Трамп 15 январь куни Мексикада ишлаб чиқарилган ҳамда АҚШга олиб кириладиган автомобилларга 35 фоиз солиқ киритишга ваъда берди. Унинг сўзларига кўра, исталган компания учун заводини Қўшма Штатлар ҳудудида қуриш анча фойдали иш бўлар экан.