Қирғизистон фавқулодда вазиятлар вазирлиги Бишкек яқинида Boeing юк самолётининг ҳалокатга учраган жойида қидирув-қутқарув ишларини яна тиклади. Бу ҳақда ТАСС маҳкама матбуот хизматига асосан хабар бермоқда.

"Қидирув тадбирлари 8.00 да бошланди, уларда тахминан 50 киши иштирок этмоқда, шунингдек, махсус техникалардан фойдаланилмоқда", - дея маълум қилишган матбуот хизматида. Фожиа жойидаги барча ишлар душанба куни кеч тушиши билан тўхтатилди. Республика ФВВ раҳбари Куботбек Бороновнинг маълум қилишича, вайроналар тагида ҳалок бўлганларнинг жасадлари қолган бўлиши мумкин. Лайнер қулаган ер “майда парчалардан” тозаланди, у ерда Boeing’нинг йирик бўлаклари қолди, холос.

Қирғизистонга бугун Халқаро авиация қўмитаси экспертлари келиши кутилмоқда. Уларга ҳалокат жойидан топилган қора қутилар таҳлил қилиш учун топширилади.

Мамлакат ФВВ ҳудудларга юк самолёти фалокатида ҳалок бўлганларнинг жасадларини етказиб бериш бўйича ишни бошлади. “Ҳалок бўлганларнинг жасадини етказиб бериш бўйича махсус техника ажратилди, уларнинг қариндошлари иссиқ овқат билан таъминланди ҳамда “Семетей” меҳмонхонасига вақтинчалик яшаш учун жойлаштирилди”, - дейилади хабарда.

ТАСС’нинг республика ФВВга асосан хабар қилишича, айни дамда 32 инсоннинг шахси аниқланган, улар орасида лайнернинг тўрт учувчиси ҳам бор. Фақатгина “бир неча жасад бўлаклари” кимга тегишли экани номаълумлигича қолмоқда.

Қирғизистонда бугун миллий мотам эълон қилинди. 

Маълумот учун, Туркияга тегишли самолёт Дача-Суу қўрғонига қулаб тушгани оқибатида 43 та ҳовли-жойдан 32 таси зарарланган ёки бутунлай вайрон бўлган. 31 киши ҳалок бўлган, 11 киши шифохоналарга етказилган. Аввалроқ 37 киши ҳалок бўлгани, улар орасига самолёт экипажининг 4 нафар аъзоси ҳам кириши маълум қилинганди.