«Манчестер Сити» «Барселона»дан Лионель Мессини 100 млн фунт (тахминан 115 млн евро) эвазига сотиб олмоқчи.

The Sun хабарида қайд этилишича, инглизлар клуби ҳозирча расман таклиф бермаган, аммо музокаралар давомида «шаҳарликлар» вакиллари  29 ёшли бу футболчи учун айнан шунча маблағ тўлашга тайёрлиги айтилган.

Шунингдек, унга ҳафтасига 800 минг фунт стерлинг миқдорида маош тайинланиши режалаштирилган. Бу орқали футболчи дунёдаги энг кўп маош олувчи футболчига айланиши мумкин бўлади.

Қайд этиш керакки, агар бу трансфер амалга ошса, бу тарихдаги энг қимматбаҳо трансферга айланади. 

Ҳозирда бу кўрсаткич ўтган йилнинг ёзида «Ювентус»дан «Манчестер Юнайтед»га 89 млн фунт (105 млн евро) эвазига трансфер қилинган Поль Погбага тегишли ҳисобланади.

Месси каталонияликлар жамоаси сафида 8 марта Испания чемпиони бўлишга улгурган. У шунингдек бу жамоа билан 4 марта Испания Кубоги ва 4 марта Чемпионлар Лигаси ғолибига айланган. Жорий мавсумда аргентиналик футболчи 24 учрашувда майдонга тушиб, 27 гол урди ва 9 голга ҳаммуаллифлик қилди.

У жамоа билан мавжуд шартномани узайтиришга шошилмаяпти.