Нигерия ҳарбий-ҳаво кучлари Боко Ҳарам экстремистларига қарши миссияси доирасида адашиб қочқинлар лагерига зарба берди. Бунинг натижасида 100дан зиёд киши ҳалок бўлди, жабрланганлар орасида гуманитар ташкилотлар ходимлари ҳам бўлган. Бу ҳақида Борнодаги давлат амалдори хабарига асосланиб, The Telegraph News нашри хабар берди

Қизил Ҳоч ташкилотининг номини ошкор қилишни истамаган ходими сўзларига кўра, гуруҳдаги 20 нафар кўнгилли ҳам ҳалок бўлган.

Манбага кўра, ҳарбий қўмондон, генерал Лаки Ирабор Камерун чегараси яқинидаги Раннинг шимоли-шарқидаги тасодифий бомбардимонни тасдиқлаган. 

Маълумотларда таъкидланишича, бу Нигерия ҳарбийлари  ўз айбига иқрор бўлган биринчи ҳолатдир. 

Ираборнинг сўзларига кўра, жароҳатланганлар орасида икки аскар, Чегарасиз Шифокорлар ва Қизил Хоч кўнгиллилари бўлган.

Чегарасиз шифокорлар маълумотларига кўра, уларнинг Ранндаги жамоаси 50 жасадни ҳисоблаган ва ҳозирда 120 нафар жароҳатланганларга ёрдам бермоқда. 

Таъкидланишича, Камерун ва Чаддаги тиббиёт ва жарроҳлик бригадалари жароҳатланганларга ёрдамга шай. 

Манбага кўра, ҳарбий-ҳаво кучлари томонидан қасддан зарба берилмаган, шундай бўлса-да, бу борада тергов ишлари йўлга қўйилади.