Афғонистон шарқидаги Нангарҳор вилоятида АҚШга тегишли учувчисиз учар қурилма ҳалокатга учради. Толиблар уни жангарилар уриб туширганини маълум қилишган бўлса, АҚШ қуролли кучлари бунга техник носозлик сабаб бўлганини айтган. Бу ҳақда Pajhwok Afghan News агентлиги маълум қилди.

Душанба куни кечқурун юз берган ҳодиса ҳақида агентликка Афғонистон куч маҳкамаларидаги манба хабар берган. Шу билан бир қаторда, у бунга нима сабаб бўлганини ойдинлаштирмаган. Маҳаллий ҳукумат вакили эса ушбу ҳодиса юзасидан изоҳ бермади.

Агентлик маълумотларига кўра, “Толибон” ҳаракати айнан унинг жангарилари Американинг бу қурилмасини уриб туширганини маълум қилган.

“Биз учувчисиз учар қурилмаларимиздан бири Нангарҳор вилоятида душанба куни ҳалокатга учраганини тасдиқлаймиз. Шунингдек, у уриб туширилган эмас, балки двигатель ишидаги носозлик сабаб қулаганини маълум қиламиз”, - дея Афғонистондаги АҚШ қўшинлари расмий вакили агентликка маълум қилган.