Миср ҳукумати миллий терма жамоанинг собиқ футболчиси Муҳаммад Абутрикани «Биродар-мусулмонлар» диний-сиёсий ташкилотига алоқадорлиги учун террорчилар рўйхатига киритди. Бу ҳақда BBC хабар тарқатди.

Абутрика Миср ҳукумати томонидан террор ташкилоти сифатида баҳоланган ассоциацияга молиявий кўмак кўрсатганликда айбланмоқда. 2012 йилда ушбу футболчи мамлакатнинг ўша вақтдаги президенти, «Биродар-мусулмонлар» намоёндаси Муҳаммад Мурсийни очиқ қўллаб-қувватлаганди.

2013 йилда Мурсий ҳарбий исён натижасида ҳукуматдан ағдарилди. Ўша йили Абутрика ҳам профессионал фаолиятини якунлаганди.

Абутриканинг адвокати маълум қилдики, ҳозирча футболчига расман айблов эълон қилинмаган, лекин у апелляция беришга тайёр турибди.  

2008 йилда Африканинг энг яхши футболчисини аниқлаш учун сўровномада Муҳаммад Абутрика  тоголик Эммануэль Адебайордан ортда қолиб, иккинчи ўринни эгаллаган. У Африка қитъасида ўйновчи энг яхши футболчи сифатида 4 марта тақдирланган (2006, 2008, 2012, 2013).