Avstraliya bosh vaziri Malkolm Ternbull mamlakat vazirlar mahkamasida qator o‘zgarishlarni amalga oshirdi. Bunga yaqinda yuz bergan mojarolar tufayli sog‘liqni saqlash va sport vaziri Syuzan Lining iste'foga chiqishi sabab bo‘lgan, deb yozadi The Australian.
Qayd etilishicha, Avstraliya sog‘liqni saqlash va sport vaziri lavozimiga Greg Xant tayinlangan. Bungacha Xant mamlakat sanoat, innovatsiyalar va fan vaziri bo‘lib kelgan. Xantning o‘rni vazirlar mahkamasi kotibi bo‘lib ishlagan Artur Sinodinosga ishonib topshirilgan.
Ternbullning so‘zlariga ko‘ra, yangi tayinlovlar yirik o‘zgarish hisoblanmaydi, balki bir iste'fo bilan bog‘liq kadrlar almashinuvidir.
Nashrga ko‘ra, yangi vazirlar kelasi hafta boshida Kanberrada qasamyod qilishadi.
