Италиянинг марказий қисмида яна бир кучли зилзила содир бўлди. 

Corriere della Sera хабарига кўра, куннинг биринчи қисмида кузатилган 5,3-5,7 балли зилзиладан кейин 1 соат ўтиб шу ҳудудда 5,4 балли иккинчи зилзила рўй берди.

Қайд этилишича, бу ҳудудларда (Лацио, Абруццо ва Марке вилоятлари) болалар ўқув биноларидан эвакуация қилинган. Рим шаҳрида метро фаолияти йўловчилар хавфсизлиги учун тўхтатилган.

Ҳукумат аҳолидан уйларини тарк этишни ва қутқарувчилар биноларнинг бардошлигини текширмагунича кўчаларда қолишни сўрамоқда.

Ҳозирча қурбонлар ва жабрланувчилар ҳақида маълумотлар келиб тушмади.

Эслатиб ўтамиз, 2016 йилнинг 24 августида Италиянинг Марказий қисмида 6,6 балли зилзила рўй берди. Бу кучли зилзила оқибатида Аматриче, Аккумоли ва Аркуате шаҳарларида 300га яқин киши ҳалок бўлди, минглаб уйлар вайронага айланди. Октябрь ойида ҳам мамлакатда зилзилалар содир бўлди ва ўнлаб кишилар жароҳатланди.