Россия президенти Владимир Путин АҚШнинг янги президенти Дональд Трамп ҳақида "сохта материалларга буюртма бераётганларни" "фоҳишалардан баттарроқ" деб атади. Бу ҳақда "Интерфакс" ахборот агентлиги хабар бермоқда. 

"Улар ҳеч қандай маънавий чегараларга эга эмаслар", деб айтди Путин.

Гап шундаки, британ разведкасининг собиқ агенти Кристофер Стил томонидан тайёрланган Трамп ҳақидаги материалда у 2013 йилда Москвага келганда фоҳишаларни ёллагани айтилган. Ушбу материал Buzzfeed сайти томонидан чоп этилган: нашрнинг таъкидлашича, у ҳужжатдаги маълумотларни текшира олмаган, бироқ бунга қарамай, уни жамоатчиликка тақдим қилишга қарор қилган. 

Ҳужжатда шунингдек Россия махсус хизматларида Трампга компромат борлиги айтилган. Россия буни рад этмоқда. Трампнинг айтишича, Россия ҳеч қачон уни шантаж қилмаган.

Путин Трамп россиялик "ижтимоий жавобгарлиги паст даражада бўлган қизлар" билан учрашганини "базўр тасаввур қилишини" айтган, чунки Трамп гўзаллик танловларини ташкиллаштириш билан шуғулланган ва "дунёнинг энг лобар аёллари билан мулоқот қилган". 

"Улар шубҳасиз дунёда энг зўрлари, бироқ Трамп бунга лаққа тушганига шубҳам бор", деб қўшимча қилган Путин.

"Фоҳишалик – бу жирканч ижтимоий ҳолатдир", деб айтган Путин.