Жанубий Кореянинг Hyundai ва Kia автомобилсозлик компаниялари келгуси беш йилда АҚШда ўзларини ривожлантириш учун 3,1 миллиард доллар миқдорида сармоя киритади. Automotive News порталининг хабар қилишича, бу маблағларнинг аксарияти Қўшма Штатларда янги завод қурилишига сарфланади. 

Янги беш йилликда сарф этиш режалаштирилган маблағ, компанияларнинг ўтган беш йилда сарфлаган сармоясидан деярли бир баравар кўпдир. Таҳлилчиларнинг фикрича, Корея автомобилсозларининг бундай сиёсати, АҚШнинг сайланган президенти Дональд Трампнинг баёнотларига ўзига хос жавобдир. У, жумладан, автомобилсозлик ва бошқа фирмаларни мамлакат ичкарисида ишлаб чиқаришни ривожлантиришга чақирган эди. Трамп, Мексика ҳудудида ишлаб чиқарилган автомобилларга 35 фоизлик солиқ жорий қилиш билан таҳдид ҳам қилганди. 

Тахминларга кўра, Hyundai ва Kia компанияларининг янги заводи премиум тоифадаги Genesis бренди моделларини ишлаб чиқаради. Бундан ташқари, Америка бозори учун махсус тайёрланган йўлтанламас ҳам янги завод маҳсулотига айланиши эҳтимол. Шу билан бирга, Hyundai Монтгомеридаги Sonata, Elantra ва Santa Fe моделлари йиғиладиган заводини модернизация қилишни ҳам кўзламоқда. 

Сармояларнинг 30-40 фоизи тадқиқот ва илғор технологияларни ишлаб чиқишга сарфланади.