Туркияда тест режимида Geliyoo миллий интернет-қидирув тизими ишга тушди. Бу мамлакат ҳукуматида катта қизиқиш уйғотди. Haberler янгиликлар порталининг хабар беришича, Туркия транспорт, денгиз ва коммуникациялар вазири Аҳмад Арслон миллий қидирув хизматидан фойдаланиш давлатга катта фойда келтиради, деб ҳисоблайди. 

"Бу мамлакат учун жуда муҳим. Бизнинг ўз қидирув тизимимиз, электрон почта хизматимиз бўлади ва бу фуқароларимиз учун ҳам қулай. Шунингдек барча маълумотлар хорижда эмас, ўзимизда қайта ишланиши ҳам катта аҳамиятга эга", - деди вазир. 

Geliyoo компанияси раҳбари Ҳоқон Отабошнинг таъкидлашича, қидирув тизимини ишлаб чиқишга 10 йил ва 10 миллион турк лираси (2,7 миллион доллар атрофида) кетган. "Биз қидирув тизимини тест режимида ишга туширдик, 2018 йилга бориб эса, 3 миллион фойдаланувчига эга бўлиш ва ички тармоқ сегментнинг тахминан 7 фоизини банд қилишни кўзлаяпмиз", - деди у. 

Geliyoo раҳбарининг сўзларига кўра, ҳозирча унинг компанияси - Туркияда миллий қидирув тизимини ишлаб чиқишга қодир ягона компания.

Geliyoo сайтида қидирув тизими, янгиликлар сервиси, форум ва электрон савдо портали тест режимида ишламоқда. Келгусида компания фойдаланувчиларга электрон почта сервисини тақдим этиш ва хизматлар ҳамда иловалар рўйхатини кенгайтиришни режалаштирмоқда.