АҚШ, Жанубий Корея ва Япония ҳарбий-денгиз кучлари бугун уч кунлик машқларни бошлашди. Унда Шимолий Корея баллистик ракеталарини кузатиш ва йўқ қилишдаги ўзаро ҳаракатлар режаси ишлаб чиқилмоқда. Kyodo агентлигининг хабар беришича, уларда Aegis ракеталарга қарши мудофаа тизими билан жиҳозланган учта – Американинг "Кертис Уилбур", Жанубий Кореянинг "Сэжон тэван" ва Япониянинг "Кирисима" кемаси иштирок этмоқда.

Аввалроқ Сеулда КХДР янги турдаги, катта эҳтимол билан қитъалараро баллистик ракетани учиришга тайёргарлик кўраётгани ҳақида хабарлар пайдо бўлганди. Улар мобил учириш қурималарида ўрнатиб бўлинган бўлиши мумкин.

Япония ҳарбий-денгиз кучлари шу сабабдан бундай ракеталарни йўқ қилиш ҳақида буйруқ олишган. Бу ҳолат улар мамлакат миллий хавфсизлигига раҳна солса юз беради.

Маълумот учун, Шимолий Корея сўнгги вақтларда ўзининг ракета дастурини фаоллаштирди. Пхеньян ўтган йилда ҳар хил турдаги 20та ракетани учирди. Шунингдек, КХДР қитъалараро ядро ракетаси ишлаб чиқиш ишларини бутунлай якунлаганини ҳам таъкидлаган.