Туркия ҳукуматининг фикрича, Сурия инқирозига ушбу мамлакат президенти Башар Асадсиз барҳам бериб бўлмайди. Бу ҳақда Давос форуми доирасида Туркия бош вазирининг ўринбосари Меҳмет Шимшек сўз юритган.

"Сурия халқининг азиятига Асад айбдор, аммо биз прагматик бўлишимиз, ҳақиқатга тик боқишимиз керак. Вазият кескин ўзгарди, шу сабабли Туркия инқирозга Асадсиз барҳам беришни бошқа таъкидлай олмайди. Бу имконсиз", - деган Шимшек.

"Ўйлайманки, биз имкониятимиздагилардан фойдаланишимиз керак. Россия, Эрон, Туркия ва АҚШ айни шундай қилмоқда", - деган Туркия ҳукумати вакили. 

2016 йил 30 декабридан Суриянинг бутун ҳудуди бўйлаб ҳарбий ҳаракатларга барҳам бериш тартиби кучга кирди. Келишувга ҳукумат қўшинлари ва мухолифатнинг 60 мингдан ортиқ бўлган қуролланган кучлари қўшилган. Россия ва Туркия ўзаро сулҳ кафолатлари ҳисобланади. 

23 январда Остонада Сурия тинчлик музокаралари бўлиб ўтиши режалаштирилган. Шимшекнинг қайд этишича, Остонадаги саммитдан умид катта. 

Эслатиб ўтамиз, Сурия инқирозига тинч музокаралар йўли билан барҳам бериш бўйича Қозоғистон пойтахтида кўптомонлама музокаралар бўлиб ўтади. Унда, Россия, Туркия, Эрон ва Сурия вакиллари иштирок этади. АҚШ ҳукумати саммитга таклиф этилган.