Туркия ИШИД террорчи гуруҳини молиялаштирган, мамлакат президенти Тоййиб Эрдўған эса ИШИД билан алоқадорлик ва Суриядан нефтни контрабанда қилишда айбланмоқда. Япониянинг TBS телеканали орқали намойиш этилган интервьюда Сурия Араб Республикаси (САР) президенти Башар Асад ана шундай баёнот билан чиқди. 

"Энг аввало, агар очиқчасига айтадиган бўлсак, ИШИД 2006 йилда АҚШ назорати остида Ироқда ташкил этилган. Сурия можароси бошланганидан кейин Туркия бу ташкилотни молиялаштириб келган. ИШИД  хомашё экспорт қилиш ва даромад олиш, шунингдек ўз сафига янги жангчиларни оғдириш мақсадида Суриянинг нефть майдонларидан фойдаланган. Туркия Эрдўғаннинг иштироки ва ёрдами билан бевосита нефть контрабандасига қўшилган", - дея таъкидлади Башар Асад. Шундай экан, Асад Туркия ёки АҚШнинг ИШИД билан реал кураш олиб боришини кутишга ҳожат йўқлигига ишонч билдирди. 

Манбага кўра, Асад Эрдўғаннинг ИШИД ва Жебхат-ан-Нусра террорчилари билан "гўёки курашаётганини намойиш этишга уринаётган"ини таъкидлади, аслида эса "у бу ташкилотларни ҳар куни қўллаб-қувватлайди". "Унинг қўллаб-қувватлашисиз бу ташкилотлар узоққа бомасди", - дея қайд этди Сурия президенти. 

Шунингдек Асад ўз режимининг фуқароларга қарши гўёки кимёвий қуролдан фойдалангани ҳақидаги айбловларни мутлақо инкор қилди. 

"Бу бўлиши мумкин эмас, ҳеч ким ўз халқига қарши оммавий қирғин қуролларидан фойдаланмайди, - деди у. - Жуда муҳим маълумот - 2013 йилда биз кимёвий қуролнинг тўлиқ тақиқланиши тўғрисидаги битимни имзолаганмиз ва бутун арсеналдан воз кечганмиз - бизда бундай қуролнинг ўзи йўқ. Аслида кимёвий қуролни террорчиларнинг ўзи қўллаган ва бу илк марта 2013 йилда содир бўлган".

Президент шунингдек Сурия ҳукумати ўшанда тергов олиб бориш учун БМТдан мамлакатга махсус комиссия юборишни талаб қилган, лекин "бу ташаббус АҚШ томонидан блокланган". "Чунки агар комиссия Сурияга келганида, улар айнан террорчиларнинг бизнинг аскарларга қарши хлор қўллаганига аниқ далиллар топган бўлишар эди", - дея изоҳ берди у.