Бугун АҚШнинг сайланган президенти Дональд Трамп қасамёд қилади ва лавозимига киришади. У сайловолди кампаниясининг ўзида турли хил шов-шувли баёнотлари билан донг таратишга ва сайловдан сўнг молия бозорларини титратишга муваффақ бўлди. 

Айни вақтда, черковда бўлган Дональд ва Мелания Трамп, диний маросим поёнига етгач, Оқ уйга йўл олишади. Бу ерда амалдаги президент Барак Обама ва Мишель Обама билан чойхўрлик қилишади. 

Вашингтоннинг турли кўчаларида эса, янги президентдан норози бўлганлар, «Трампга йўқ, Ку-Клукс-Кланга йўқ! Расистлар, фашистлар, йўқолсин!» каби сўзлар ёзилган плакатларни олиб, намойишлар ташкил этишган. 

Айтиш жоизки, Трампнинг Оқ уй эгасига айланишидан ҳамма ҳам бирдек рози эмас. Ундан норозилар орасида, фақатгина зиёлилар, Ҳолливуд юлдузлари бор эмас. 

ABC News ва Washington Post томонидан ўтказилган ижтимоий сўровларга кўра, Трамп сўнгги 40 йилда инаугурация вақтида энг ҳурмат қилинмаган президент бўлмоқда. Уни ҳозирда 40 фоиз аҳоли қўллаб-қувватламоқда. Барак Обама, Билл Клинтон ва Жорж Бушларнинг бу борадаги кўрсаткичи, ўз вақтида 80-82 фоизни ташкил этган эди.

ABC news телеканалига кўра, Трамп президентлик қасамёдини иккита Инжилда қабул қилади. Улардан бирида Авраам Линкольн қасамёд қилган бўлса, иккинчиси янги президентга бир вақтлар онаси берган ҳадя экани айтилмоқда. 

Шу билан бирга, кўплаб америкалик бой-бадавлат ва обрўли инсонлар бугунги кунни унчалик ҳам хушламасдан қаршилашмоқда. Хусусан, миллиардер ва меценат Жорж Сорос, Давосда чиқиш қилар экан, янги президентни «ёлғончи ва фирибгар», деб атаган. Сороснинг фикрича, Трампнинг дунёқараши бўйича идеал давлат – бу  «диктатура ёки мафия давлатидир». Бозорлар ҳақида фикр билдирган молиячининг айтишича, у Трампдан имкон қадар узоқда бўлади ва барча бизнес вакилларига шундай йўл тутишни тавсия қилади.