Қонунчилик ҳужжатларини баҳолаш тизими порталида “Халқ билан мулоқот ва инсон манфаатлари йили” Давлат дастури лойиҳаси тақдим этилди. Унинг бир қатор жиҳатлари экспортни рағбатлантиришга йўналтирилган. Бу ҳақда norma.uz хабар берди
  
Хусусан, ўз маҳсулотини экспорт қилувчи корхоналарга бериладиган имтиёзларни бу жараёнда иштирок этган савдо-воситачи ташкилотларга ҳам қўллаш кўзда тутилган. Бундан ташқари, барча хўжалик субъектларига мева-сабзавот маҳсулотини тўғридан-тўғри битимлар бўйича экспорт қилиш ҳуқуқи берилади.
 
Экспорти ман қилинган (нон ва гўшт маҳсулотлари, тирик қорамол ва парранда) товарларнинг алоҳида экспорт тизими ташкил этилади. Бу махсус рухсатномалар асосида амалга оширилади. Шунингдек, истеъмолда бўлган машиналар, асбоб-ускуналар ва техникани экспорт қилиш тартиби енгиллаштирилади ҳамда аниқлаштирилади. 
 
Лойиҳа ўзгартирилиши, тўлдирилиши ёки рад этилиши мумкин.