Туркия президенти Ражаб Тоййиб Эрдўған АҚШнинг янги президенти Дональд Трамп билан Яқин Шарқдаги вазиятни муҳокама қилиш ниятида эканини билдирди. У Қўшма Штатларга режалаштираётган ташрифи чоғида айни масалага эътибор қаратади, деб хабар қилган РИА Новости агентлиги.

«Туркия Яқин Шарқ мамлакатларининг ҳудудий яхлитлиги тарафдори ва минтақа харитасини ўзгартишларга уринишни қўллаб-қувватламайди. Ҳозирда, менинг Вашингтонга ташрифим имконияти ўрганилмоқда. Албатта, Трамп билан музокараларда бу масалаларни батафсил муҳокама қилишни хоҳлайман», — деган Эрдўған. 

«Туркияни Трампнинг ушбу минтақа бўйича қараши қизиқтириши табиий. Бугунги кунда бу минтақа аланга домида қолмоқда. Турк раҳбариятига айрим маълумотлар келиб тушмоқда ва бу Анқарани ташвишлантиради. Буларнинг барчасини муҳокама қилиш керак», — деган Туркия етакчиси. 

Унинг сўзларига кўра, Туркия минтақанинг энг кучли ва таъсирли давлатидир, шу боисдан, Яқин Шарқ бўйича қарорлар Анқара билан муҳокама қилиниши лозим. 

«Агар минтақага алоқаси йўқ кимдир, унинг ўзига хос жиҳатларига эътибор бермасдан  қарор қабул қилса, бу инсоният тақдирига салбий таъсир кўрсатади», — дея хулоса қилган Эрдўған.