Хитойнинг BYD компанияси яқин 2-3 йил ичида АҚШда электромобиллари ва гибридларини сотишни бошламоқчи. Бу ҳақда компания директори ўринбосари Ли Юньфенга иқтибос келтирган ҳолда "Коммерсантъ" нашри хабар бермоқда. 

BYD АҚШ енгил автомобиллари бозорига чиқадиган Хитойнинг биринчи автомобилсозлик компанияси бўлиши мумкин. Ҳозирда АҚШда бу бренднинг автобуслари сотилмоқда, яқин йилларда хитойликлар АҚШ аҳолисига гибридлар ва электрокарларни таклиф қилмоқчи.

Аввалроқ Хитойнинг Guangzhou Automobile Group компанияси шўъба корхонаси GAC Motor 2019 йилда АҚШ бозорига чиқмоқчи эканлиги маълум қилинганди. Компания юк машиналари, автобус ва енгил автомобиллар ишлаб чиқаради ва Toyota, Honda ва Fiat каби номдор компаниялар билан ҳамкорлик тажрибасига эга.