Исроил бош вазири Биньямин Нетаньяху АҚШнинг янги президенти Дональд Трамп билан суҳбати чоғида Сурия, Эрон ва фаластинликлар ҳақида суҳбатлашишини маълум қилди. Нетаньяху Трамп билан 22 январда қўнғироқлашмоқчи. 

Нетаньяху томонидан эълон қилинган мулоқот Трамп инаугурациясидан кейин икки етакчининг биринчи ўзаро суҳбати бўлади.

"Бугун кечки пайт мен ва президент Трамп ўртасида телефон орқали мулоқот бўлади. Бизнинг олдимизда Исроил-Фаластин муаммоси, Суриядаги вазият, Эрон солаётган таҳдид каби масалалар бўлади", деб айтди бош вазир. 

Нетаньяху АҚШнинг эндиликда собиқ президенти Барак Обама ташқи сиёсатда эришган сезиларли муваффақиятлардан бири ҳисобланувчи Эрон ядровий дастури бўйича келишувнинг дунёдаги бош танқидчиси сифатида маълумдир. Нетаньяхунинг таъкидлашича, бу келишув нафақат Эроннинг ядро давлати сифатидаги мақомини қонунийлаштирди, балки санкциялар бекор қилиниши эвазига бутун Яқин Шарқ бўйлаб тарафдорлари, жумладан Ливан, Сурия ва Ямандаги ҳарбийлаштирилган гуруҳларни қўллаб-қувватлашни кенгайтиришига имкон берди.  

Исроил етакчилари Трамп яҳудий давлати манфаатларини Обамага нисбатан анча кўпроқ қўллаб-қувватлашига умид қилмоқдалар. Обама ва Нетаньяху ўртасида фаластинликлар билан муаммони ҳал қилишдаги ёндашувлар, Эрон атоми муаммоси ва иккала давлатда сайловлар вақтида сайловчиларга таъсир кўрсатишга уринишлар борасида ўзаро шубҳалар сабабли ҳавас қилса арзигудек муносабатлар ўрнатилмаганди.