Бразилиянинг марказидаги Гояс штатидаги қамоқхоналардан биридан 14 маҳбус қочиб кетди, деб хабар бермоқда Globo телеканали.  

Телеканал маълумотларига кўра, маҳбуслардан бири қўққисдан қўриқчига ҳужум қилиб, ундан қуролини тортиб олган. Сўнгра бошқа бир қўриқчини турма эшигини очишга мажбур қилган. Қочоқлардан бирортаси ҳали ушланмаган.  

Бразилияда 2017 йил боши қамоқхоналардаги бир қатор исёнлар билан бошланди. Бразилия тарихидаги бундай исёнлардан энг йириги Манаус шаҳрида 1 январда юз берди. Ўшанда икки рақиб гуруҳнинг ўзаро ихтилофи сабабли бошланган тартибсизликларда 50 дан кўпроқ одам ҳалок бўлган.  
 
Шундан кейин Бразилия ҳукумати ахлоқ-тузатиш муассасаларини ислоҳ қилиш дастурини қабул қилган. Бразилияда аксарият турмалар меъёридан тўлиб-тошган.