Шанхай ҳамкорлик ташкилоти (ШҲТ) Котибияти расмий сайти sectsco.org эндиликда уч – хитой, рус ва инглиз тилларида ишламоқда.
Бу ҳақда ШҲТ Котибияти матбуот релизисида айтилган.

Айни дамда Котибиятда асосан рус ва хитой тилларидан фойдаланилади. Релизда таъкидланишича, эндиликда сайтга ташриф буюрганлар уч тилда ташкилот, унинг Пекиндаги қароргоҳида ўтказиладиган асосий тадбирлар ҳақида маълумот олишлари мумкин.

"Веб-сайтимиз аудиторияси учун қулайлик яратиш мақсадида, шунингдек, эксперт, илмий ва бошқа ҳамжамиятлар ШҲТ ҳақида ишончли маълумотни олишлари учун, Котибият матбуот хизмати барча ҳужжатлар пакетини уч тилда жойлаштирди. Улар ШҲТ доирасида унинг 15 йиллик фаолияти давомида қабул қилинган", - дейилади хабарда.

Маълумот учун, ШҲТга Қозоғистон, Қирғизистон, Хитой, Россия, Тожикистон ва Ўзбекистон аъзо саналади. 2015 йилнинг июлидаги Уфа саммитида ташкилотга Ҳиндистон ва Покистоннинг киритилиш жараёни бошлангани ҳақида хабар қилинди. Ҳаммаси бўлиб “ШҲТ оиласига” кузатувчи давлатлар ва шериклар билан қўшиб ҳисоблаганда 18 та мамлакат киради.

ШҲТ Котибияти ташкилотнинг ижро этиш органи ҳисобланиб, Пекинда жойлашган. Котибият ШҲТ ишини мувофиқлаштириш, ахборот-таҳлил, юридик ва техник таъминлаш билан шуғулланади.